Латвійскія кампаніі, нягледзячы на санкцыі, працягваюць забясьпечваць расейскія прадпрыемствы ваенна-прамысловага комплексу мікрасхемамі, якія, у прыватнасьці, выкарыстоўваюцца для вытворчасьці балістычных ракет «Іскандэр», сьцьвярджае ў сваім расьсьледаваньні The Insider.

Пасьля пачатку поўнамаштабнай расейскай агрэсіі ва Украіне, увядзеньня санкцый і ўзмацненьня жорсткасьці экспартнага кантролю, з Латвіі ў Расею, як зазначае выданьне, было імпартавана мікрасхем на мільёны эўра.

У РФ, як удакладняюць расьсьледавальнікі, увозілася, у тым ліку прадукцыя Рыскага завода паўправадніковых прыбораў (РЗПП) «Alfa». У гэтага прадпрыемства ў Расеі ёсьць філіял ТАА «Альфа», які, аднак, не займаўся імпартам рыскіх мікрачыпаў. Гэтыя тавары, па дадзеных расьсьледавальнікаў, да лютага 2022 года ўвозілі ў Расею дзьве фірмы: ТАА «Кампанія Леста-М» і ТАА «Альфа-ЛР».

Пасьля пачатку поўнамаштабнай вайны з імпартэраў, якія закупляюць мікрасхемы ў РЗПП, застаецца «Кампанія Леста-М». Толькі ў контрагентах у яе зараз лічацца рыская кампанія ALFA RPAR і дзьве, відаць, кітайскія фірмы: Dalian Stella Trading Co. Ltd і Liaoning Jinhechuang Logistics Co. Ltd. На працягу няпоўнага года ваенных дзеяньняў, як падкрэсьліваюць расьсьледавальнікі, яны закупілі ў РЗПП прадукцыі на $1,7 млн.

Атрыманыя ад названых фірм мікрачыпы «Кампанія Леста-М» пастаўляла прадпрыемствам расейскага ваенна-прамысловага комплексу.