Сьвятлане Ціханоўскай задалі пытаньне, чаму беларусы не паўстаюць цяпер, як яны зрабілі ў 2020 годзе, бо пратэст у Беларусі цяпер мог бы зьмяніць хаду вайны.

У адказ яна патлумачыла цяперашні ўзровень рэпрэсіяў у Беларусі, дзе штодня затрымліваюць дзясяткі людзей і дзе турэмнае зьняволеньне можа пагражаць за любыя дзеяньні, якія не падабаюцца ўладам.

Аднак пры гэтым Ціханоўская выказала ўпэўненасьць, што беларусы будуць гатовыя да пратэсту, калі паўстане магчымасьць.

Паводле яе, цяпер Беларусь мае дзьве галоўныя праблемы — жахлівы ўзровень рэпрэсіяў і пагрозу страты незалежнасьці. Ціханоўская заклікала дэмакратычныя краіны не забывацца пра сытуацыю ў Беларусі.

У дыскусіі, прысьвечанай змаганьню супраць дыктатураў, таксама ўзялі ўдзел былы кіраўнік тыбэцкага ўраду ў выгнаньні Лабсанг Сангай і прэзыдэнт Радыё Свабодная Эўропа / Радыё Свабода Джэймі Флай.

Кіраўнік РСЭ/РС адзначыў, што ў шэрагу краін ня толькі праца незалежных журналістаў, але і доступ да незалежнай інфармацыі дагэтуль можа быць рызыкай. Ён расказаў пра перасьлед беларусаў за распаўсюд навінаў Радыё Свабода і іншых незалежных СМІ.

Напярэдадні, у першы дзень канфэрэнцыі, Сьвятлана Ціханоўская сустрэлася з прэзыдэнткай Славаччыны Зузанай Чапутавай. Сярод тэмаў, якія абмяркоўвалі на сустрэчы, — разьмяшчэньне расейскай ядзернай зброі ў Беларусі, а таксама магчымасьць прыцягнуць рэжым Лукашэнкі да адказнасьці за незаконны вываз украінскіх дзяцей і за рэпрэсіі супраць беларусаў.

Хто такая Сьвятлана Ціханоўская

Сьвятлана Ціханоўская — беларускі палітык, былая кандыдатка ў прэзыдэнты Беларусі. Цяпер знаходзіцца ў Літве.

• Сьвятлана Ціханоўская нарадзілася ў 1982 годзе ў Мікашэвічах (Берасьцейская вобласьць).
• 15 траўня 2020 году пасьля адмовы Цэнтральнай выбарчай камісіі зарэгістраваць мужа Сьвятланы, зьняволенага лідэра кампаніі «Страна для жизни» блогера Сяргея Ціханоўскага, Сьвятлана ад свайго імя падала дакумэнты на рэгістрацыю ініцыятыўнай групы. 20 траўня яе групу зарэгістравалі. 29 траўня кіраўніка яе выбарчага штабу Сяргея арыштавалі зноў.
• Кандыдаткай у прэзыдэнты Ціханоўскую зарэгістравалі 14 ліпеня 2020.
• Пасьля арышту прэтэндэнта на пасаду прэзыдэнта Віктара Бабарыкі і ўцёкаў за мяжу яшчэ аднаго прэтэндэнта Валера Цапкалы іх штабы аб’ядналіся з штабам Сьвятланы Ціханоўскай. Аб’яднаны штаб правёў пасьпяховую выбарчую кампанію з шматтысячнымі мітынгамі ў вялікіх і малых гарадах Беларусі пад бел-чырвона-белымі сьцягамі.
• Паводле афіцыйных зьвестак ЦВК, на выбарах Сьвятлана Ціханоўская набрала 10,09%, а Аляксандар Лукашэнка — 80,08%. Ціханоўская адмовілася прызнаць гэтыя вынікі і 10 жніўня асабіста накіравалася ў ЦВК, каб іх абскардзіць.
• З ЦВК палітык не вярнулася. Сувязь зь ёю зьнікла, празь некалькі гадзін у вэстыбюлі ЦВК яна паведаміла, што «прыняла рашэньне» і зьехала ў невядомым кірунку. 11 жніўня стала вядома, што яна ў Літве. Былі апублікаваныя два відэазвароты Ціханоўскай, адзін зь якіх быў запісаны ў ЦВК пасьля размовы з двума высокапастаўленымі сілавікамі, у ім Ціханоўская заклікае дэманстрантаў не выходзіць на вуліцы. Кіраўніцтва Літвы 11 жніўня заявіла, што звароты Ціханоўская запісала пад ціскам і шантажом.
• Празь некалькі дзён пасьля фактычнай «дэпартацыі» ў Літву Сьвятлана Ціханоўская заявіла, што бярэ на сябе ролю «нацыянальнага лідэра».
• 18 жніўня з ініцыятывы Сьвятланы Ціханоўскай у Беларусі была створаная Каардынацыйная рада для транзыту ўлады.
• 10 верасьня 2020 Сэйм Літвы прагаласаваў за прызнаньне Сьвятланы Ціханоўскай абраным кіраўніком Беларусі.
• Ад верасьня 2020 году Ціханоўская наведала з працоўнымі візытамі дзясяткі краін сьвету і сустрэлася зь іх лідэрамі. Сярод іх прэзыдэнт Францыі Эманюэль Макрон, канцлер Нямеччыны Ангела Мэркель, высокі прадстаўнік ЭЗ Жузэп Бурэль, прэзыдэнт ЗША Джо Байдэн ды інш.
• Сьвятлана Ціханоўская кантактавала з актыўнымі людзьмі ў Беларусі падчас пратэстаў 2020 і 2021 гадоў, прызначыла сваіх прадстаўнікоў для падтрыманьня лучнасьці з сацыяльнымі і прафэсійнымі групамі ў краіне.
• Ціханоўская выступіла за правядзеньне ў Беларусі новых празрыстых прэзыдэнцкіх выбараў пры міжнародным кантролі і актыўна заклікала міжнародную супольнасьць да ўдзелу ў арганізацыі перамоваў зь цяперашнім кіраўніцтвам Беларусі.
• За два гады Ціханоўская, яе штаб і зьвязаныя з ёй ініцыятывы дапамагалі палітвязьням, выступалі з шэрагам гуманітарных і палітычных ініцыятываў.
• Яна выступала супраць сфальшаванага канстытуцыйнага рэфэрэндуму, ініцыяванага Лукашэнкам у 2022 годзе.
• У лютым 2022 Ціханоўская асудзіла расейскую агрэсію супраць Украіны і саўдзел у ёй рэжыму А. Лукашэнкі, у сакавіку 2022 году стварыла беларускі Антываенны рух.
• У красавіку 2022 году Ціханоўская на канфэрэнцыі Рады Бясьпекі ААН заявіла, што «поўдзень Беларусі фактычна знаходзіцца пад расейскай акупацыяй».
• Ціханоўская правяла пасьпяховыя перамовы з урадам Польшчы і дамаглася асаблівых умоваў для прыезду і легалізацыі беларусаў, ня згодных з рэжымам Лукашэнкі.
• У жніўні 2022 году Сьвятлана Ціханоўская стварыла Аб’яднаны пераходны кабінэт, назвала чатырох сваіх прадстаўнікоў.
• У лістападзе 2022 Ціханоўская ўпершыню назвала сябе прэзыдэнтам-электам